Kategoria Superiore u rikthye ditën e djeshme pas një pezullimi të gjatë, ndërsa u luajtën ndeshjet e javë së 27-të të kampionatit.
Tirana e rifilloi kampionatin aty ku e la, me një fitore në transfertë 1-3 kundër Bylisit, ndërsa Partizani humbi në shtëpi kundër Skënderbeut duke konfirmuar sezonin e vështirë që po kalojnë.
Pas këtyre rezultateve duke folur për “Rubrika Sportive”, Shkëlqim Muça bëri një analizë të ndeshjeve dhe se si i pa ai skuadrat. Ai është shprehur se Tirana me fitoren e marrë ndaj Bylisit, i ka dhënë fund diskutimeve për titullin kampion ndërsa sezoni i Partizanit tashmë është i dështuar, por duhet të punohet për tu arritur Europa.
“E kam thënë edhe më parë që kjo do të ishte një ndeshje vendimtare për titullin. Unë prisja të shikoja një Bylis tjetër, me agresiv, por nuk ishte ashtu. Kjo ndeshje sipas mendimit tim e ka mbyllur diskutimin për titullin kampion dhe besoj se në javët e ardhshme do të thellohet diferenca me Kukësin.
Te Partizani situata nuk është e qetë dhe ambienti duket që është i tronditur. Partizani ka dështuar në gjithçka këtë vit, duke filluar nga rezultatet deri tek renditja. Edhe fati ndonjëherë nuk e ka dashur, pasi kujtojmë se për shumë minuta dominoi në pjesën e parë. E humbi ndeshjen për 3 minuta, pasi para kësaj ata kishin 2-3 raste për të shënuar. Pastaj natyrisht bëhet më e vështirë, por Partizani gjatë gjithë lojës e komandoi dhe luajti mirë.
Më shumë ishte pa fat sot, me lojë më pëlqeu, ka lojtarë dhe grup shumë të mirë, por ka finalizimin skandaloz. Ka dështuar te sulmuesit se po të shohësh se Bardhi që është sulmuesi kryesor, nuk është në rolin e tij. Nuk ka pykë të mirë, nuk lidhen krahët me njëri-tjetrin. Çinari gjithashtu ka probleme në finalizim. Ky është sezon i dështuar, drejtuesit do të mundohen të kapin Europën, me kalendarin që ka mund ta kapë.”, ka thënë Muça.
