Besnik Daci, drejtori i shkollës “Azem Hajdari”, ku studionte 15-vjeçarja, e cila u përdhunua nga roja i shkollës dhe 3 persona të tjerë, mësohet se është shkarkuar nga kjo detyrë.
Daci, sipas raportimeve, është zëvendësuar nga zv.Drejtoresha e shkollës.
Një ditë më parë Daci mohoi që të ishte në dijeni të skandalit, apo që prindërit e vajzës së përdhunuar të kishin shprehur shqetësime te ai lidhur me çështjen.
Skandali u bë publik pak ditë më parë, ndërsa sipas deponimeve të 15 vjeçares, ajo ishte përdhunuar nga roja i shkollës Abaz Dogu, 65 vjeç, dhe më pas nga 3 persona të tjerë, për të cilët Gjykata Penale e Tiranës vendosi masat e sigurisë “arrest me burg”.
Një ditë më parë dy deputete socialiste Mimi Kodheli dhe Vasilika Hysi u shprehën se ky ishte një skandal që tregonte dështimin jo vetëm të punonjësve të sigurisë në shkolla, por edhe stafit pedagogjik. Të dy deputetet kërkuan marrjen e masave urgjente dhe reagime nga institucionet.
