Një 34-vjeçar është vënë në pranga nga uniformat blu të Elbasanit pasi ka goditur me mjetin tip “Toyota” portën hyrëse të Drejtorisë së Policisë në këtë qytet dhe ka hyrë në oborrin e saj, duke mos iu bindur urdhrit për të ndaluar të dhënë nga punonjësi i Policisë që kryente shërbim në hyrje të DVP-së.
Pas hekurave ka përfunduar shtetasi B. L., 34 vjeç, banues në Elbasan.
Ky shtetas, pasi ka hyrë në oborr, ka dalë nga mjeti me një pistoletë me gaz në dorë, duke bërë lëvizje të pakontrolluara, por është neutralizuar dhe prangosur menjëherë nga shërbimet e Policisë.
Ngjarja ka ndodhur rreth orës 11:00 dhe dyshohet se 34 -vjeçari ka qenë në gjendje të rënduar psikologjike.
Specialistët për Hetimin e Krimit dhe grupi hetimor po vijojnë veprimet për sqarimin e rrethanave të ngjarjes.
