Inter dhe Paris Saint Germain janë në kontakt të pandërprerë për të arritur në një marrëveshje të re për sulmuesin, Mauro Icardi. Periudha e huazimit të argjentinasit te PSG-ja skadon këtë verë, ndërsa francezët janë të interesuar për të siguruar përfundimisht shërbimet e tij.
Marrëveshja e verës së kaluar ishte për huazim me të drejtë blerjeje për shifrën e 70 milionë eurove, por deri tani klubi francez ka bërë dy oferta më të ulëta dhe ka marrë një refuzim të menjëhershëm nga ana e zikaltërve.
Sipas mediave italiane, Leonardo dhe Wanda Nara kanë pasur një fundjavë intensive dhe kanë arritur marrëveshjen për një kontratë 4-vjeçare me pagë 10 milionë euro në sezon, ndërsa tani drejtuesi i PSG-së është përqendruar të bindë klubin zikaltër.
Nga ana tjetër Interi duket se është dorëzuar dhe ka vënë si kusht që të arkëtojë të paktën 60 milionë euro kesh për shitjen e argjentinasit, duke hequr kështu dorë nga shifra e kërkuar më parë prej 70 milionë eurove.
