Partia Demokratike i është përgjigjur akuzave të Ministrit të Brendshëm, Saimir Tahiri pas publikimit të fotos, ku kreu i PD takohej me një person, që sipas Tahirit ishte trafikant droge.
PD i kërkon ta arrestojë, por thotë se trafikantët i shpëtojnë policisë, duke i kujtuar ‘baronin e drogës’ Klement Balilajn. PD akuzon Tahirin se i ka miq kërcënuesit e Kryeprokurorit të Republikës.
“Do të donim shumë që ky trafikanti te ishte në prangat e policisë duke dhënë sqarime edhe për aludimet miqësore të ministrit Tahiri. Por siç ka ndodhur deri tani çuditërisht trafikantet i shpëtojnë policisë. Flagrant është rasti i baronit të drogës Balilajt që shëtit i lirë dhe nën mbrojtjen e Tahirit në Sarandë. Nuk mund të fshihesh pas aludimesh dhe akuzash kaq ordinere ti që je përgjegjësi kryesor i kthimit të vendit në hambar drogë dhe njeriu qe u jep mbrojtje të drejtpërdrejt trafikanteve të drogës, gjobëvënësve dhe kriminelëve. Sot në fakt po prisnim reagim tënd ose të kryeministrit për kërcënimin që i është bërë Prokurorit të Përgjithshëm. Thuhet se kërcënuesit janë miqtë e tu”, shprehet PD.
Ajo i quan shpifje akuzat e maxhorancës dhe i kërkon institucioneve përgjegjëse të zbardhin çështjen e kërcënimeve ndaj Prokurorit të Përgjithshëm.
“Urojmë dhe shpresojmë që institucionet përgjegjëse ta zbardhin sa më parë këtë ngjarje të denjë për vendet ku sundon mafia dhe krimi. Në rast se mendoni se me shpifje do t’i mbyllni gojën opozitës, jeni të dështuar. Beteja totale kundër krimit, drogës dhe lidhjeve tuaja dhe të Edi Ramës me kartelin, sapo ka nisur”, deklaron PD.
