Barcelona i ka idetë e qarta dhe prioritet për merkaton e ardhshme të transferimeve është përforcimi i repartit të mbrojtjes.
Së fundmi klubi katalanas ka shfaqur interes për mbrojtësin e Interit, Skriniar, si një alternativë serioze për prapavijën e tyre. Megjithatë duket se gjiganti spanjoll kërkon të eksplorojë edhe opsione të tjera dhe tanimë “Sport Mediaset” raporton se në interesin e tyre është kapiteni i Milanit, Alessio Romagnoli.
Gjithnjë sipas medias italiane, Barcelona po mendon t’i ofrojë Milani lojtarë si Emerson ose Todibo për ta ulur çmimin e 25-vjeçarit, pasi preferon të mos ketë nevojë të shpenzojë shuma të mëdha parash për shkak të dëmeve financiare që ka sjellë Covid-19.
E ardhmja e Samuel Umtiti te skuadra spanjolle është në dyshim edhe për shkak të dëmtimeve të shumta të francezit ndërsa duhet menduar edhe zëvendësimi i Gerard Piques në të ardhmen e afërt duke parë moshën e madhe të tij.
