Me perfomancat e tij me Brescian, Sandro Tonali, ka bërë që të ketë shumë admirues në Serie A por jo vetëm. 20-vjeçari cilësohet nga mediat italiane si Pirlo i ardhshëm dhe Interi e ka vendosur mesfushorin në listën e prioriteteve gjatë merkatos së transferimeve.
Sipas Gazzetta dello Sport, Beppe Marotta i Interit ka lëvizur për të nisur një tratativë të ngjashme me atë kur siguruan Barellan, duke i ofruar Brescias huazim me detyrim blerje për 35 mln euro dhe bonuse.
Por gjithsesi beteja për Tonalin pritet të jetë e vështirë për zikaltërit pasi të interesuar për të është edhe Juventusi, të cilët mund të vendosin në tavolinë të njëjtën ofertë ose të përmirësuar për talentin italian.
Me Conten në drejtim, Interi është kthyer papritur në një skuadër konkurruese ndërsa po përpiqet ti shtojë ekipit elementë të rinj cilësorë.
