Gresild Lika është padiskutim talenti që ka spikatur më shumë te Luftëtari në këtë sezon të vështirë për bluzinjtë të cilët ndodhen në vendin e parafundit të Kategorisë Superiore.
Në një prononcim për Fan Zone në Supersport, Lika foli për rinisjen e stërvitjes, për kontratën që ka me Luftëtarin, zbuloi idhullin e tij në Superiore ndërsa nuk e fshehu se do t’i pëlqente të rikthehej te Partizani.
“Kishim arritur një formë shumë të mirë, unë edhe ekipi. Kjo për shkak të trajnerit Novi, i cili është më shumë shok se trajner për ne”.
“Trajneri na ka dhënë një program për stërvitje në kushte shtëpie. Nuk kemi qëndruar në shtëpi, disa në shtëpi disa në kushte të tjera, megjithatë nuk është njësoj si në fushë me ekipin”.
“Kam një kontratë me Luftëtarin dhe ia di shumë për nder që më dhanë besim. Nuk do e kisha për turp nëse luaj në Kategorinë e Parë. Çdo lojtar dëshiron të ketë më shumë minuta, do flasim me drejtuesit dhe do vendosin ata për të ardhmen time”.
“Jasir Asani ka qenë më i mirë në Superiore. Idhulli im ka qenë gjithmonë Gjergji Muzaka, e kam ndjekur atë për gjithçka”.
“Mosha nuk ma lejon që të merrem shumë me femrat, duhet të përqendrohem më shumë te futbolli. Kemi marrë vesh që të hënën do nisim stërvitjen.
“Do të mashtroja nëse do thoja nuk kam dëshirë të kthehem te Partizani, por gjithçka do e vendosin drejtuesit e Luftëtarit.”, u shpreh Lika për “Supersport”.
