Të përballosh pandeminë e koronavirusit mes familjes dhe punës bëhet akoma më e vështirë. Informacioni në këtë periudhë ka qenë gjithmonë i rëndësishëm, ndaj për asnjë moment puna e gazetarëve nuk është ndalur.
Gazetarja dhe drejtuesja e emisionit “Tempora” në RTV Ora ka rrëfyer eksperiencën e saj të kësaj periudhe në emisionin “Ditë e Re”.
I është dashur të kujdeset edhe për familjen edhe për emisionin, që ndryshe nga ditët e zakonshme është zhvilluar në kushtet ku çdo i ftuar ka qenë në lidhje me skype.
Sonila Meço: Vështirësia më e madhe për gazetarin është gjetja e burimit të duhur të informacionit dhe në kushte rreziku dhe pandemie të paprovuar më parë, ti e kupton se çfarë do të thotë. Në atë rast ti duhet të jesh jo vetëm profesionist, por edhe me një intuitë të fortë, ndonjëherë edhe me fat, sepse ky nuk është vendi që shquhet për transparencë të kulluar të informacionit nga ana e autoriteteve zyrtare. Kështu që kjo ka qenë vështirësia më e madhe.
Vështirësia e dytë ka qenë edhe e formës, jo vetëm e përmbajtjes. Ti duhet të ndërtosh një studio dhe disa orë programi të domosdoshëm i vetëm, duke përdorur skypin, lidhjet me atë cilësi që janë. Kështu që dhe në formë dhe në përmbajtje ka qenë sfidë më vete, por unë mendoj se ia dolëm.
Por a duhet ti ndryshojë AMA këto rregulla, që tashmë shumica e bizneseve janë hapur dhe jeta ka ndryshuar?
Sonila Meço: Nuk është thjesht AMA të hapë studiot që të vinë njerëzit dhe të mbushet studioja. Në vetvete nuk është ky qëllimi i gazetarisë. Qëllimi i programeve tona është që të sjellim sa më shumë këndvështrime brenda programit. Teknologjia nuk na i bën të mundur këtë gjë. Dmth nuk ka arritur dot ende që të sigurojë që brenda një programi në mënyrë të njëkohshme të përballen me këtë mundësi shumë ide. Ne mund ta ndërtojmë shumë thjesht edhe në kushtet aktuale, nxjerrim gazetarët në terren, bredhim Shqipërinë cep me cep me kushtet e reja të lëvizjes dhe ne e sjellim atë që është e domosdoshme. Thjesht duhet të krijohet mundësia që tashmë që transparenca është e duhura, jemi në një periudhe post covid-19, ku ekonomia po përballon një krizë të fortë, jeta sociale është sfiduar, njerëzit dalin nga një gjendje e paprovuar me herët kështu që për ti shkuar transparencës deri në fund, për të bërë të mundur hedhjen dritë mbi atë që ndodhi, të kapim shpejt ritmin do të duhej që dhe forma të vijë në funksion të përmbajtjes dhe për këtë arsye të lehtësojë mënyra si ne ndërtojmë programet tona.
