Mësimi online i zhvilluar gjatë situatës së krijuar nga koronavirusi duket se është i shoqëruar me shumë vështirësi.
Kjo edhe për vetë faktin se ajo u aplikua në një mënyrë të menjëhershme pa u dhënë mundësinë dhe kohën pedagogëve dhe studentëve të adaptohen.
Drejtues i departamentit të matematikës dhe statistikës në universitetin amerikan në Uashington, Artur Elezi i ftuar në hapësirën e intervistës në RTV Ora shprehet se mësimi online është i vështirë dhe në kushtet më ideale.
Elezi: Mësimi në distancë ka dhe disavantazhet e saj në kushtet më të mira. Në universitetin tonë kemi klasa të vogla me nga 28 vetë dhe e bazojmë aktivitetin mësimor mbi punën në grupe, aktivitete të ndryshme. Puna bazohet në energjinë që marrim nga bashkëpunimi me studentët tanë. Është shumë e vështirë që të krijohet kjo metodë mësimdhënie në mësimin në distancë. Kjo është vështirësia e parë. Vështirësia e dytë është se ka shumë lëndë dhe shumë degë që e kanë të pamundur që të zhvillohen online. Ky sistem u aplikua në konditat e një shoqërie në stres dhe u aplikua me një kthesë të menjëhershme. Kjo kthesë nuk na lejoi që të adaptonim programet në mënyrë të mirëfilltë me trajnime të stafit pedagogjik. Stresi i përgjithshëm i shoqërisë manifestohet me faktin që studentët në mënyrë të menjëhershme humbën lirinë. Kjo krijon një gjendje shumë të rëndë psikologjike. Kjo situatë i demotivon studentët për sa i përket mësimit online, kjo e fundit nuk është gjendja më e rëndësishme. Ne e ulëm ritmin e punës. U bëmë pak më shumë fleksibël në drejtimin e marrëdhënieve me studentët. Pamë dhe çdo situatë të sudentëve tanë dhe mundësitë e tyre për të ndjekur mësimin online. Të gjithë janë në shtëpi. Kanë hapësira apo jo apo kanë internet për të ndjekur takimet online.
Gjithashtu ai shprehet se dhe procesi i vlerësimit të studentëve është i pamundur në këto kushte.
Elezi: Në konditat e një sistemi online, megjithëse mësimi zhvillohet në distancë, testimet zhvillohen në ambjente të mbyllura nën mbikqyrje. Por tani meqënëse gjithçka është e mbyllur është një proces i pamundur. Ka qenë dhe do mbetet një problem shumë i madh. Ne jemi përpjekur të organizojmë disa forma, por sërish është e vërtetë. Është e vështirë që të bëhet një gjë e tillë është në këtë situatë.
