Kreu i qeverisë Edi Rama në një intervistë me gazetarin Çim Peka në Syri tv, ka folur për situatën pandemike në Shqipëri, por dhe për ndryshimin e shpeshtë të qendrimeve të tij lidhur me aktualitetin.
I pyetur nga Peka se pse brenda 1 jave Rama ndryshoi dy herë qendrim lidhur me pandeminë, ku fillimisht deklaronte se nuk ka asnjë problem dhe pastaj fliste për varre, kryeministri i hodhi sërish fajin medias se e ka nxjerrë deklaratën e tij nga konteksit.
Pjesë nga intervista:
Peka: Në fillim deklaruat se nuk ka asnjë problem, pastaj terrorizuat njerëzit. Pse me dy qendrime?
Rama: E para njëherë unë nuk kam ndryshuar asnjë qendrim. Në 19 shkurt është bërë takimi i parë i Këshillit të Sigurisë në qeveri për COVID dhe janë bërë 2 mbledhje përgatitore, dhe unë kam thënë në fillim atë që duhej thënë në fillim. Ne jemi vendi i parë në Europë që kemi shpallur masat në momentin që është shpallur rasti i parë. Prapë them se kjo nuk është një situatë murtaje.
Peka: Fotot me të vdekur i kemi nxjerrë ne apo ju. Mungesë për varre i kemi thënë ne apo ju?
Rama: Gjërat e nxjerra nga konteksti ndryshojnë gjërat. Unë jam përpjekur të sensibilizoj njerëzit duke sjellë fakte nga realiteti i vendeve të tjera duke publikuar fakte nga media të mëdha ndërkombëtare.
