Ministrja e Shëndetësisë, Ogerta Manastirliu, tha se testet seriologjike duhen validuar përpara se të aplikohen për qytetarët.
Ajo tha se nuk duhet që të bëjmë gabimet që janë bërë në Spanjë dhe Itali, ku testet tregonin herë pozitive dhe herë negative.
“Po punojmë me një grup ekspertësh për të validuar këtë testim. Personeli mjekësor dhe policia janë në grupet e riskut”, tha Manastirliu në emisionin “Open”.
Ajo tha se Shqipëria është në një studim klinik të OBSH lidhur me protokollet e mjekimit të Covid-19. “Studimet klinike kanë të bëjnë me vlerësimin e barnave, pra si veprojnë ato në të sëmurët me koronavirus, pasi janë medikamente që janë përdorur për sëmundje të tjera si për malarjen, apo trajtimin në neuro-patalogji”, tha Manastirliu.
Lidhur me planin e masave për lehtësimin, Manastirliu vuri theksin në vigjilencën e strukturave të shëndetësisë dhe angazhimin e mjekëve të familjes në këtë fazë, por edhe kujdesin që duhet të tregojnë vetë qytetarët. Ajo tha se po ecim me hapa të kujdesshëm për të shmangur një valë të dytë të pandemisë së Covid-19.
