Në një kohë kur bota duket se po fiton luftën ndaj koronavirusit, ka akoma mjekë skeptikë që thonë se më e keqja s’ka ardhur akoma.
Mjeku britanik, Chris Whitty paralajmëron se një valë e dytë e koronavirusit mund të jetë më e rëndë se e para dhe mund të përhapet më shpejt.
Ai thotë se edhe vendet që kanë vendosur të lehtësojne masat duhet të tregohen të kujdesshëm për të mbajtur nën kontroll pandeminë.
Mjeku Whitty shpjegon se niveli i riprodhimit të virusit që njihet si R, duhet të mbahet poshtë 1, që do të thotë se çdo i infektuar nuk duhet që të infektojë më shumë se një person tjetër. Në të kundërt do të kemi situatë më të rënduar.
“Ne duhet të sigurohemi që R nuk kalon më lart se një. Sepse nëse po, do të kthehemi në një valë të dytë. Është plotësisht e besueshme që një valë e dytë do të jetë më e rëndë se e para. Covid-19 ka një rrugë të gjatë deri në mbarim, dhe zhdukja është teknikisht e pamundur për këtë sëmundje” tha Whitty.
Sakaq, ai shtoi se ka shumë të panjohura për këtë virus, përfshirë edhe çështjen nëse është sezonal apo jo.
