Erion Piciri, i cili mori mandatin e ligjvënësit pas largimit të deputetëve të PD-së, i ka propozuar Kuvendit që të ulet në masën 30% paga e deputetëve, duke përfshirë dietat, shpërblimet, karburantin dhe shërbimin e telefonit.
“Paga bazë mujore bruto e deputetit nuk duhet të kalojë dyfishin e pagës mesatare mujore në nivel kombëtar dhe me gjithë komisionet, shpërblimet, dietat, transportin dhe telefonin nuk duhet të kalojë trefishin e pagës mesatare mujore në nivel kombëtar”, thuhet ndër të tjera në propozimin e Picirit.
Në një letër drejtuar kryeparalementarit Ruçi, më datë 30 prill 2020, Piciri ka kërkuar që paga e tij të shkojë e gjitha në fondin e shtetit për të mbështetur bizneset dhe familjet e prekura nga koronavirusi, nga prilli 2020 deri në fund të mandatit në vitin 2021.
Gjithashtu, ai i kërkon vullnetarisht kryeparlamentarit Gramoz Ruçi që dhe përfitimet e tij personale për periudhën qershor 2019 – mars 2020 të kalojnë në fondin shtetëror për të prekurit nga tërmeti i 26 nëntorit.
“Paraja në xhepat e qytetarit është më e vlefshme se në dorën e burokratit”, përmbyll letrën e tij drejtuar Ruçit deputeti Erion Piciri.
