Kryebashkikja në detyrë e Shkodrës, Voltana Ademi, dhe zv. ministri i Brendshëm, Besfort Lamallari, u përplasën mes tyre në emisionin “Open” lidhur me shifrat e vdekjeve nga koronavirus dhe masave të Qeverisë.
Ademi tha se Ministria e Shëndetësisë nuk i ka raportuar të dhënat e sakta nga Shkodra. “Ka pasur viktima nga Shkodra që kanë ndërruar jetë, duke pasur sëmundje të tjera por që janë prekur edhe nga Covid-19. Janë 5 viktima të tilla. Këto kanë ndërruar jetë në spitalin e Shkodrës dhe atë të Tiranës”, tha Ademi.
Por, zv.ministri Lamallari tha se nuk ka një qëllim për të fshehur të dhënat. “Nuk ka kuptim që të fshihen të dhënat”, tha ai.
Ndërkohë Ademi tha se përdorimi i situatës së pandemisë politikisht dështoi në Shkodër, gjë që u kundërshtua nga Lamallari.
“Përdorimi politikisht i pandemisë në Shkodër dështoi. Pandemia nuk na ka prekur vetëm neve por mbarë botën. Të jesh i sëmurë nuk është turp, por të jesh i sëmurë do të thotë të kesh nevojë për përkujdesje”, tha Ademi.
Por, Lamallari tha se në fillim në Shkodër nuk u zbatuan masat siç duheshin.
“Në fillim të pandemisë në Shkodër nuk po zbatoheshin masat e marra. Nuk kishthte një thirrje të duhur për të sensibilizuar qytetarët. Pas vizitës në Shkodër, morëm disa masa duke mbyllur tregjet dhe duke ndaluar shëtitjet, ç’ka çoi në normalizimin e situatës”, u shpreh ai.
