Dy vëllezër humbën jetën në një atentat që ndodhi pasditen e së hënës në Durrës.
Besmir dhe Viktor Haxhia, i pari biznesmen dhe i dyti avokat në qytetin e Durrësit janë viktimat e një ekzekutimi mafioz që ndodhi sot rreth orës 16:40, tek vendi i quajtur “tregu i makinave” , Shënvlash.
Sipas burimeve nga grupi hetimor ka gjetur 55 gëzhoja në vendin e ngjarjes dhe dyshohet të jetë qëlluar nga dy armë.
Mësohet se vëllai i Viktorit, Besmiri ka qenë me precedent penalë jashtë vendit dhe njihet edhe me nofkën Miri i Kolës. Burimet pranë tyre thonë se ai ka jetuar në Hollandë për një kohë të caktuar ku edhe është marre me biznes dhe më pas është kthyer në Shqipëri. Dyshimet janë hedhur se ai ka qënë objektivi i atentatit, që i ka marrë jetën edhe të vëllait.
Ndërkaq forca të shumta policie po krehin zonën ndërkohë që në hyrje daljet kryesore dhe rrugët dytësore forcat e policisë po ushtrojnë kontrolle të shumta të personave dhe automjeteve që lëvizin në këtë zonë.
Në ndihmë të Policisë Vendore kanë mbërritur Forcat Speciale Renea dhe Forcat e Ndërhyrjes së Shpejtë të Tiranës.
Është ngritur menjëherë një grup i posaçëm hetimor i përbërë me Specialistët të Drejtorisë Vendore të Policisë Durrës dhe Specialistë të Departamentit të Policisë Kriminale dhe nën drejtim e Prokurorisë vijon puna për fiksimin e çdo prove materiale që do çonte në zbardhjen e ngjarjes, identifikimin dhe kapjen e autorëve, tha Policia.
