Nga Lirim Zalla*
“UEFA. Ikën Platini, erdhi slloveni Ceferin. Federata si gjithnjë pa dinjitet, servile, e nënshtruar, inferiore, rri me gojën hapur në rreshtat e pasmë. Pa gjuhë, pa bosht, pa strategji deri e shpërfillur. Ajo vrapoi të bëjë foto e selfie me presidentin e ri të qeverisë europiane të futbollit. Paturpësia preku mesazhet, sms, ‘Instagramin’, madje edhe televizionet e kapura.
Me buzëqeshje të lumtur, në kor ligjëruan ‘fitoi shoku ynë’, ‘lobuam për mikun tonë’. Ku shkoi ‘Miku i Madh i shqiptarëve, Platini’. Në cilin xhep u fut tani ai që vdiste për Federatën e sidomos për zv/presidentin?! Çfarë u bë me Mishelin e grupit ‘o robo’?! Më vjen gjynah për kryeministrin Rama që ia sillnin në zyrë Platininë për premtime boshe sa herë kishte zgjedhje.
Por, frëngjishtja ama ishte interesante dhe Federata për shumë minuta mbetej ‘në autobus’, nuk kuptonte asgjë. Edi Rama dilte me Platininë në media për shumë projekte, por më i paparë ishte ai që në Programin Shkollor të futej Ora e Futbollit. Utopi që mbeti si zar mashtrimi para zgjedhjeve.
U harrua Platini, bile së fundmi tanët u fshehën prej tij se mos i shikonte njeri. U flak Vilar, i cili kur doli kandidat për president i UEFA-s, mori premtimin solemn të shqiptarëve. I gjori ishte gjithnjë në krahun tonë. Dritëshkurtrit thirrën në apel disa eksponentë frankofonë se e njohin presidentin e ri.
Heeeeej, ky i riu është jurist dhe ka ardhur për të spastruar gjithçka kriminale në futbollin europian. Sipas dokumenteve të fundit, Shqipëria është e para në kontinent. Urime President i UEFA-s! Kujdes Federatë…”, mbyllet komenti i ish-drejtuesit të Zyrës së Shtypit pranë FSHF-së.
Së fundmi, klubi kampion i Shqipërisë u dënua me një vit pezullim nga UEFA për shkak të ndeshjeve të trukuara, në një kohë që kampionati ynë ka qenë gjithmonë subjekt i dosjeve voluminoze me takime shumë të dyshuara si të trukuara.
*Ish-drejtues i Zyrës së Shtypit pranë Federatës Shqiptare të Futbollit
