Eksperimenti “De Boer” është drejt dështimit dhe Interi është gati të marrë masa. E ndërsa ndeshja me Pescara-n krijoi iluzionin se gjërat po përmirësoheshin, dy shuplakat e marra kundër ekipit modest të Beer Sheva në Europa League kanë nxjerrë përsëri në sipërfaqe të gjitha problemet e zikaltërve.
Mediat italiane shkruajnë se për këtë arsye pozicioni i De Boer nuk është aspak i sigurt dhe ndeshja me Juventus-in mund të jetë vendimtare për ish-trajnerin e Ajaksit.
Holandezi ka nënshkruar një kontratë trevjeçare, por në marrëveshje është përfshirë një klauzolë që e lejon Inter-in ta largojë teknikun duke i paguar një shumë prej 1,5 milionë eurosh.
Kandidati kryesor për të marrë vendin e tij duket se është Fabio Capello, një trajner që vlerësohet shumë nga drejtuesit zikaltër dhe që do t’i jepte ekipit disiplinën dhe përqendrimin e duhur në këtë moment të vështirë.
