Komisioni i Reformës në Drejtësi miratoi sot ligjin për organin e akuzës që i heq kompetencat Adriatik Llallës të emërojë, transferojë e ndëshkojë prokurorët e rretheve.
Ashtu si dhe për Ligjin e Vetingut, opozita ndonëse e pranishme në sallë nuk ka votuar këtë ligj.
Demokratët patën sjellë një opinion që shprehte kundërshtitë me variantin që po miratohej. Disa nga vërejtjet e PD-së u morën parasysh, por jo mjaftueshëm sipas deputeteve demokratë.
Krahas specifikimit që prokuroria funksionon sipas ligjit të vjetër deri në hyrjen në fuqi të ndryshimeve kushtetuese, PD propozonte dhe ndryshimin e kritereve për zgjedhjen e kryeprokurorit, saktësimin e marrëdhënies së tij me ministrin e Drejtësisë dhe masat ndëshkimore që merren ndaj kreut të akuzës nëse ka punuar dobët.
Ligji pritet të votohet në seancën e 22 gushtit së bashku me atë për Byronë kombëtare të Hetimit, pasi OBDAT të sjellë variantin e tij mbi të vetmin nen që ndan palët.
