Presidenti i Kosovës, Hashim Thaçi, tha sot se do t’i ofrojë mandatin për formimin e qeverisë së re, kujtdo që dëshmon se ka shumicën parlamentare.
Ai i bëri këto komente, pas takimit me përfaqësuesit e partive politike parlamentare për të diskutuar rrugëdaljen nga kriza politike pas rrëzimit të qeverisë së kryeministrit tashmë në detyrë, Albin Kurti, njëherësh kryetar u lëvizjes Vetëvendosje.
Përfaqësuesja e lëvizjes Vetëvendosje, Albulena Haxhiu, tha se kjo parti nuk e ka refuzuar kërkesën e presidentit Hashim Thaçi për të emëruar mandatar të ri për kryeministër dhe vetë takimi këshillues i organizuar prej tij paraqet shkelje kushtetuese.
“Presidenti i Republikës mund të konsultohet vetëm më partinë politike ose koalicionin që ka fituar shumicën në kuvend, qoftë shumicë absolute apo relative. Pra, ky format sot është jokushtetues. Këtë e thotë edhe Kushtetuta e Republikës se Kosovës, e thotë edhe aktgjykimi i Gjykatës Kushtetuese”, tha Haxhiu, njëherësh ministre në detyrë e Drejtësisë.
Lëvizja Vetëvendosje kërkon që vendi të shkojë në zgjedhje të reja pas pandemisë. Partitë tjera politike përfshirë edhe ato të pakicave kombëtare u shprehën kundër mbajtjes së zgjedhjeve të parakohshme dhe në favor të formimit të një qeverie të re.
