Që prej 8 marsit kur u konfirmuan dy rastet e para me Covid-19 në Shqipëri janë infektuar 60 mjekë dhe infermierë, 2/3 e tyre fatmirësisht janë shëruar.
I madh ka qenë numri i të prekurve nga Covid-19 edhe në radhët e uniformave blu.
“Nga forcat e policisë rezultojnë 14 raste pozitive, ndërsa në strukturën akomoduese të Ministrisë së Mbrojtjes, strukturë shtetërore, janë 4 persona”, sqarojnë burime zyrtare nga Ministria e Shëndetësisë.
Virusi ka prekur edhe 21 fëmijë, pjesa më e madhe e të cilëve janë shëruar dhe për fat të mirë të gjithë janë trajtuar dhe monitoruar në banesa.
Referuar të dhënave zyrtare, nga koronavirusi janë prekur edhe 4 gra shtatzëna, 2 prej të cilave janë shëruar.
Drejtoresha e ISHP, Albana Fico, tha se nuk ka pasur asnjë rast të përkeqësimit të gjendjes shëndetësore të pacientëve që janë trajtuar në shtëpi,
Lidhur me mundësinë e ri-infektimit me Covid19 të pacientëve të negativizuar, ajo u shpreh “edhe nëse ka raste të tilla që janë nën investigim se kanë të bëjnë me imunitetin e pacientit nuk mund të themi në mënyrë solide se rastet e ri-infeksionit janë raste të lidhura veçanërisht me rimarrjen e këtij virusi”.
