Kryeministri në detyrë i Kosovës, Albin Kurti ishte i ftuari i parë në emisionin “Çim Peka LIVE” në Syri Televizion. Gjatë intervistës, lideri i Vetëvendosjes është shprehur se situata me Koronavirusin në vend është e vështirë, por theksoi se nuk i trembet pandemisë. Sa i përket krizës politike në vend, Kurti deklaroi se ish-ministri i brendshëm Agim Veliu u shkarkua pasi ishte pjesë e planit për copëtimin e Kosovës.
“Në projektin për ndarjen e Kosovës janë dy presidentët e Kosovës dhe Serbisë. Në këtë projekt ndodhej ish-minsitri i brendshëm që shkarkova. Nuk është më çështje shkarkimi i një ministri, ai ishte plan. Ky plan ka dy faza; shpallja e ngjarjes së jashtëzakonshme dhe ndarja e Kosovës.
Pas shpalljes së gjendjes së jashtëzakonshme, me një shumice të vogël votash, mund të bëhej mbret në Kosovë. Ai nuk është i kënaqur me komptencat që ka. Prandaj dhe e kam ftuar të rikthehet në politikë e të futet në zgjedhje. Kosova është Republikë Parlamentare dhe presidenti është noter publik”, tha Kurti.
Më tej, Kurti tha se nuk ishte nevoja që presidenti Hashim Thaçi ti dërgonte katër letra për të propozuar një emër për të marrë drejtimin e qeverisë.
“Unë i kam bërë disa pyetje presidentit që nuk është më përgjigjur. Ai refuzon të flasë me mua por më thotë “të më çojë një emër”. Duhet të përgjigjet paraprakisht për pyetjet e mia“, u shpreh Kurti.
Më tej, ai tha se ky vit është tejet i rëndësishëm jo vetëm për Kosovën, por për të gjithë Ballkanin. Kryeministri i Kosovës, tha se Thaçi kërkon një kryeministër tjetër sepse do gjendjen e jashtëzakonshme.
“Presidenti i Kosovës shkoi në Uashington dhe u kthye me duart në xhepa, me të cilën nuk e kishte marrëveshjen me Serbinë. Vuçiç në Uashington ishte fuqiplotë, ndërsa Thaçi, të cilit unë nuk iu bashkangjita, mbeti me gishtat në gojë sepse ishte një gjysëm president.”-tha Kurti.
Më tej, ai tha se bëhët fjalë për një pazar ku Serbia do merrte veriun e Kosovës dhe në anën tjetër maksimalisht qyteti i Preshevës, por pa pjesën e hekurudhës dhe autostradës, Bujanovcit apo Medvegjës.
Nëse presidenti vazhdon të tentojë një qeveri të re, çfarë do bëjë Albin Kurti?
“Ai nuk është president me kompetenca për krijimin e një qeverie. Nëse nuk ia kam dërguar emrin në letrën e parë pse vazhdon të dërgojë letra. I kanë ngelur edhe pak muaj e do të merret me politikë. Të lerë postin e të futet në garë zgjedhore. Mos të kalojë kompetencat duke shkelur postin”, tha Kurti.
“Presidenti do një kryeministër tjetër që të shpallë gjendjen e jashtëzakonshme e të marrë ushtrinë në dorë e të kthehet te projekti për ndarjen e Kosovës, që përshpejton anëtarësimin e Serbisë në BE. Ai do të jetë sa më larg gjykatës e Serbia pranë BE. Ky është një vit i rëndësishëm për Kosovën dhe Ballkanin në tërësi”, shtoi Albin Kurti.
