Mjeku imazherist pranë QSUT-së, Renato Osmenaj, deklaroi se kthimi në normalitet është i varur dhe nga situata në vendet fqinje, sidomos në Itali.
Në një intervistë për lidhjes skype për ‘News24’ Osmenaj tha se kthimi në normalitet mund të bëhet fare mirë duke bashkëjetuar dhe me koronavirusin, ndërsa shtoi se kjo nuk është tragjedi.
“Ne jemi të varur nga vendet fqinje, nuk më tremb bashkëjetesa me këtë virus. Gjithçka varet në funksion të armatës me gjithë metodologjinë dhe forcat që kemi.
Nuk është tragjedi bashkëjetesa me të. E shoh situatën të lidhur me vendet fqinje, sidomos me Italinë që jemi të lidhur. Duhet të kthehemi ne normalitet.
Kthimi në normalitet, mund të bëhet duke bashkëjetuar me COVID-in”, tha mjeku i cili shtoi se të afërmit që janë karantinuar për shkak të Covid-19, duhet patjetër të mbajnë distancë, pasi mund të shkaktohen deri tragjedi familjare.
“I sëmuri duhet ushqyer mirë, duke i dhënë lëngje, duke e mbështetur vazhdimisht. Ky person do të jetë në spital më mirë se dikush që nuk është mbajtur mirë. Mirëmbajtje dhe mjekim i mirë dhe shpëtohet jetë.
Në rast se nga një familje dalin disa me Covid-19, atëherë duhet të mbajnë distancë nga njëri tjetri, që të mos kemi tragjedi familjare. Të rrinë të ndarë, sepse janë potenciale për të sëmurë njëri-tjetrin në shkallë të rëndë”, vlerësoi Osmënaj. /BW/
