Një ditë pas arrestimit të Ilir Selmanit, një nga personat e konsideruar me një rol kyç në vrasjen e Santiago Malkos, Abc News ka siguruar video nga banesa ku strehohej ai.
Selmani kishte marrë një banesë me qira në zonën e Xhamllikut, ku fshihej prej disa kohësh. Selmani qëndronte në hyrjen e fundit të pallatit e cila kishte dalje në tarracë.
Ai u kap dje jashtë banesës së tij, në sheshin para pallatit, ndërsa aktulisht ndodhet në ambientet e policisë. Selmani është marrë në pyetje por nuk ka pranuar të flasë mbi detaje që mund të çojnë në zbardhjen e vrasjes së ish-efektivit Santiago Malko, ngjarje e cila tronditi kryeqytetin mbrëmjen e 27 gushtit të vitit të kaluar.
Në momentin e arrestimit, Selmanit iu sekuestrua edhe një pistoletë me fishek në fole, ndërkohë që bashkë me të u shoqërua edhe shoku me të cilin ndodhej kur u ndalua nga efektivët e policicë.
Selmani dyshohet se mori pjesë në ekzekutimin e Santiago Malkos, i njohur si njeri i besuar i Vis Martinajt, duke drejtuar njërën prej makinave që bënë ndjekjen e tij, ndërsa më pas është kapur nga kamerat e sigurisë duke mbledhur bishtat e cigareve të konsumuara nga Blendi Teta./abcnews.al
