“Janë të lira, mund të gjenden kudo dhe ne mendojmë se mund të shërbejë si një agjent i fuqishëm anti-inflamator”
Dy eksperimente kryesore janë zhvilluar me tabletat e kolçisinës me shpresën që ky ilaç të ndalë “stuhinë inflamatore” që ndodh në mushkëri dhe që është edhe vrasësi te viktimat e koronavirusit.
Ky ilaç do t’u jepet afro 6.000 pacientëve të koronavirusit në Kanada, ndërkohë që një veprim i ngjashëm po kryhet edhe në Greqi.
Tek personat që vuajnë nga cerma, kolçisina (Colchicine) e lehtëson inflamacionin dhe dhimbjen e gishtave të këmbës. Sipas mjekëve, ajo mund të bëjë të njëjtën gjë edhe te mushkëritë.
Ky ilaç u përdor për herë të parë që në vitin 1500 p.e.s nga egjiptianët si një medikament për trajtimin e ënjtjeve të nyjave.
Dr. Zhon-Klod Tardif (Jean-Claude Tardif) nga Instituti i Zemrës së Montrealit, thotë: “Ne duam një përgjigje sa më shpejt të jetë e mundur. Nëse ka efekt, atëherë studimi mund të ndërpritet më parë”, tha ai për radion kanadeze CBC, citon noa.al.
“Janë të lira, mund të gjenden kudo dhe ne mendojmë se mund të shërbejnë si një agjent i fuqishëm anti-inflamator”, shtoi ai.
Çfarë është cerma
Cerma, ose ndryshe podagra, është një nga llojet më të zakonshme të artritit dhe mund të shkaktojë dhembje të tmerrshme. “Cerma shkaktohet kur trupi nuk shpërbën siç duhet acidin urik”, – thuhet në librin Arthritis. Për më tepër, “është një çrregullim, shkaku i të cilit dihet mirë – prania e kristaleve të acidit urik në lëngun sinovial të kyçeve, sidomos në gishtin e madh të këmbës”.
