Një student ka humbur jetën si pasojë e një aksidenti të ndodhur në Tiranë, në një kohë kur vendi ndodhet në kushtet e masave të ndalim qarkullimit, që do të thotë një qarkullim edhe më i pakët i automjeteve.
Studenti që ka humbur jetën quhet Reldi Guga, 23 vjeç.
Ngjarja tragjike ka ndodhur ditën e shtunë pranë Uzinës Dinamo ku një shofer kamioni që po fuste materiale ndërtimi në pallatin brenda tregut, ka shtypur studentin i cili po lëvizte me biçikletë, raporton newsbomb.al
Aksidenti nuk është raportuar nga mediat, por edhe nga komunikatat ditore të policisë.
Pedagogu Erion Kristo, i cili e ka patur student Reldin, ka shkëputur një moment nga një video nga ora e leksionit, ku i riu thotë së në Shqipëri nuk zbatohen ligjet.
“Po si na ike kështu, o Reldi? Po ishe në lule të moshës, o Reldi! Po vdiqe në aksident rrugor, kur nuk kishte as makina, o Reldi!
Po lajmin për ty as nuk e dhanë, o Reldi! Po ti ishe studenti im i preferuar, o Reldi! Po ça na bëni kështu ooo njerëz? Po na shtypni! Ti e dije që këtu nuk zbatohen ligjet, o Reldi! Qofsh i parajsës, o Reldi! Shokët, miqtë, pedagogët nuk do të të harrojnë! Ngushëllime familjes!”, shkruan Erion Kristo.
