Mbrëmjen e djeshme, Paulo Dybala dhe legjenda e Juventusit Del Piero, “u takuan” në një lidhje të drejtpërdrejtë në “Instagram”.
Dy numrat 10 (Del Piero e veshi vazhdimisht nr.10 nga viti 1995 deri në 2012) shkëmbyen anekdota në një bisedë të gjatë, ndërsa argjentinasi kishte një histori të veçantë për fituesin e Kupës së Botës. Dybala rrëfeu historinë kur humbi fanellën e kapitenit historik të Juventusit në një ankand për vetëm 10 euro.
“I kisha vënë vetes qëllim ta merrja fanellën tuaj me patjetër. Futem te ky uebsajt me llogarinë e të dashurës time që njerëzit të mos e dinin që isha unë. Tani nuk e mbaj mend shifrën, por aty nuk jepej kush ishte më e larta. Vendosa shifrën time dhe ajo ishte më e larta për tre ditë. Prita dhe vetëm prita. Nëse dikush bënte një ofertë më të lartë të vinte një e-mail”.
“Mungonin dhe pesë orë e unë po prisja. Isha gati të festoja, por në fund fare dikush bëri një ofertë më të lartë dhe e humba fanellën për 10 euro. Kur doja të bëja një kundër-ofertë nuk pata më kohë. Isha shumë i nervozuar. Ishte e pabesueshme”, u shpreh Dybala.
