Kriza e krijuar nga pandemia, ashtu si sektorë të tjerë të ekonomisë, ka prekur edhe punëtorët e call center-ave. Sot, siç bën me dije “Sindikata Solidariteti”, dhjetëra punëtorë të kompanisë “Teleperformance” u njoftuan nga kjo e fundit për ndërprerje të kontratës deri në përfundimin e gjendjes së fatkeqësisë natyrore.
Sindika denoncon se punonjësve nuk iu dha asnjë shpjegim i mëtejshëm, pa lëre më një zgjidhje për hallin e tyre dhe se kompania u mjaftua me një copë letër që thotë se ‘do ju njoftojmë kur kriza të kalojë’ dhe dy fjalë që nënkuptojnë theqafjen për këdo që nuk është i kënaqur me të ngelurit i papunë në mes të fatkeqësisë.
Për ta përkeqësuar edhe më shumë situatën, informon sindikata, kjo kompani nuk i ka paguar ditët të cilat janë detyruar dhjetëra punëtorë nga kjo e fundit të futen në karranitnim si pasojë e frikës së përhapjes së virusit pas identifikimit të rastit të parë të njërit prej kolegëve të tyre.
“Një veprim i tillë nuk është vetëm shkelje e parimeve të të drejtave të punës, por krim dhe shkelje e të drejtave themelore të njeriut. Mes të pushuarve nga puna është edhe kryetari i Sindikatës Solidariteti, Tonin Preçi, rast i cili përbën shkelje më vete të Kodit të Punës, respektivisht Nenit 181, Pikave 4 dhe 5. Punëtorët nuk duhet të paguajnë barrën financiare të kompanisë si rezultat i fatkeqësive natyrore”, denoncon sindikata.
Sindikata shprehet se ndërhyrja e shtetit është e domosdoshme.
“Inspektorati i Punës duhet të marrë masat e nevojshme që punëtorët të mos mbeten në mëshirë të fatit dhe ditët e karantinimit të detyruar të paguhen plotësisht”, apelon.
“Kriza nisi, sindikata do të jetë domosdoshmëri për muajt në vazhdim dhe më tej”, e mbyll reagimin sindikata.
