Komiteti Shqiptar i Helsinkit ka reaguar lidhur me bllokimin e shqiptarëve në kufirin e gjelbër mes Shqipërisë dhe Greqisë, ndërsa e konsideron qëndrimin e autoriteteve shqiptare që nuk lejojnë hyrjen në atdhe tv disa dhjetra personave si një “trajtim johuman dhe degradues”.
Prej të premtes, dhjetra shtetas shqiptarë janë bllokuar në zonën e gjelbër, pasi autoritetet greke kanë lejuar kalimin e tyre, ndërsa ato shqiptare mbajnë të mbyllur kufirin, duke mos lejuar hyrjen.
“Qëndrimi i këtyre shtetasve në zonën neutrale për orë të tëra dhe pa kushtet minimale të jetesës vendos në rrezik jetën dhe shëndetin e tyre si dhe i nënshtron këta shtetas ndaj elementëve të trajtimit johuman dhe degradues,” thuhet në reagimin e KSHH.
Komiteti Shqiptar i Helsinkit në deklaratën e tij thekson se Kushtetuta detyron Qeverinë për mbrojtjen e të drejtave të shtetasve shqiptarë, me banim të përkohshëm ose të përhershëm” jashtë kufijve të vet.
KShH vlerëson se ndalimi i shtetasve shqiptarë për të hyrë në vendin e tyre cënon thelbin e lirive dhe të drejtave të njeriut dhe është në tejkalim të kritereve minimum të parashikuara në nenin 17 të Kushtetutës.
“KSHH i rekomandon autoriteteve një qasje humane dhe jo ndëshkuese ndaj kësaj kategorie personash, të cilët kanë vepruar në kushtet kur liria e tyre e lëvizjes është kufizuar në mënyrë jo proporcionale dhe në kushtet për të garantuar mbijetesën, pasi nuk përballojnë dot qëndrimin dhe jetesën në vendet fqinje,” thuhet në deklaratë.
