Policia dhe Ushtria duket se ka vendosur rregullin në tregun e Kombinatit në Tiranë, atje ku gjatë dy fundjavave të fundit, ka pasur një dyndje të qytetarëve pa masa mbrojtëse dhe pa respektuar distancimin social, që konsiderohen si rregullat kryesore për mospërhapjen e Covid-19.
Pamjet që u publikuan sollën reagimin e Kryeministrit Edi Rama, që urdhëroi policinë dhe ushtrinë të vendosë rregull.
Dhe sot tregun e kombinatit e kishin “pushtuar” forca të Policisë së Shtetit, asaj bashkiake dhe Policisë Ushtarake, ndërsa në mbështetje kishte edhe një autoblind.
Çdo person që hynte në treg kalonte në atë që quhej kordoni i sigurisë, dhe pas kontrollit të leje daljes, i nënshtrohej një dezifektimi.
Në treg nuk lejohet të hysh pa maskë dhe doreza, edhe pse vetë Kryeministri Rama ka deklaruar se maskat i duhen ose mjekëve, ose të sëmurëve, ose atyre që i shërbejnë kësaj kategorie.
Fotot e mëposhtme tregojnë atë se çfarë ka ndodhur sot në tregun e kombinatit, një masë që mund të ishte marrë edhe para 1 jave. Por siç thotë edhe një fjalë e urtë “më mirë vonë se kurrë”.
