Gjatë 24 orëve të fundit policia ka ndëshkuar 40 drejtues mjetesh, 119 shtetas, 9 njësi tregtie si dhe një person është vënë në pranga në zbatim të masave kufizuese, për vënien në kontroll të pasojave që sjellin përhapjen e COVID-19.
Burime zyrtare bëjnë me dije se 40 drejtues mjetesh janë ndëshkuar me heqje të lejes së drejtimit dhe bllokim mjeti, pasi kanë shkelur urdhrin e ndalim qarkullimit. Ndërsa 116 shtetas janë gjobitur me 10.000 lekë pasi janë komnstatuar nga shërbimet e Policisë duke lëvizur në këmbë apo me biçikleta, pa ndonjë arsye apo emergjencë.
Gjithashtu janë ndëshkuar dhe 3 shtetas me gjobë 20.000 lekë pasi nuk kanë zbatuar urdhrin për kufizimin e lëvizjeve në parqe dhe zona të gjelbra të hapura, në zonat urbane apo mjedise të tjera publike të hapura.
Në Tiranë është arrestuar shtetasi G. S., 50 vjeç, pasi u kap duke drejtuar mjetin në gjendje të dehur, në masën 1.14 mg/l . Këtij shtetasi i është tërhequr dhe leja e drejtimit, pasi nuk ishte i pajisur me autorizim për lëvizje.
Në të gjithë vendin janë konstatuar dhe 9 njësi tregtie që nuk kanë zbatuar orarin e mbylljes dhe ndaj administratorëve është marrë masa administrative, në bazë të nenit 3, pika 7 e Aktit Normativ Nr. 3, datë 15.03.2020.
Policia apelon për qytetarët se nuk do të lejohet asnjë këmbësor të dalë për shëtitje, aktivitet sportiv apo për motive të tjera, përveç emergjencave mjekësore dhe atyre që shkojnë në punë, të cilët duhet të kenë me vete kartën e identitetit dhe vërtetimin e punës nga punëdhënësi.
Për të bërë pazar në qendrat urbane, një pjesëtar i familjes duhet të aplikojë në e-Albania apo në numrin falas 55155, për t’u pajisur me autorizim, ndërsa pensionistët nuk lejohen në mënyrë kategorike të dalin nga banesa.
