Trajneri i Partizanit, Adolfo Sormani, ka folur për Top-Channel për situatën emergjente për shkak të COVID-19, gjestin e Shqipërisë me mjekët e dërguar në Itali dhe prtishmëritë që ka pasi e gjitha kjo të kalojë.
“Është një moment i veçantë, shumë i vështirë për vendin tonë. Ditët e kaluara kryeministri juaj, Rama bëri një gjest të madh solidariteti, teksa dërgoi 30 mjekë e infermierë në një moment delikat. Numri i të prekurve është shumë i lartë dhe administrimi i situatës ishte i vështirë, sidomos për personelin mjekësor.”
Situata në Itali: Është e qartë se kjo situatë po jetohet me shumë kujdes, por edhe sikur të ndodhesha në Itali, nuk do të isha ndihmë. Ky nuk është momenti për të lëvizur, është momenti për të qëndruar në shtëpi, mund të japësh ndihmën vetëm në momentin kur bën detyrën si qytetar.
Karantina në Shqipëri: Në aspektin njerëzor, është një moment kur flet me miqtë, me personat që janë larg. Kam pasur fatin të udhëtoj shumë dhe kështu njoh shumë persona nga disa vende të botës dhe në këto momente, kur të gjithë janë të përfshirë, ka një ndjenjë të fortë solidariteti.
Ndërpreja e kampionatit: Edhe mediet në Itali më kanë kontaktuar për të më bërë këtë pyetje. Në një situatë të tillë, mendoj se aspekti sportiv duhet të kalojë në plan të dytë. Ka persona që vuajnë e po vdesin në të gjithë botën. Mendoj se të flasësh për futboll është mungesë respekti kundrejt personave që po punojnë për të shpëtuar jetë e për ata që për fat të keq na kanë lënë.
Situata te Partizani: Besoj se kur të rifillojë kampionati, skuadra do të ketë shumë stimuj për të marrë rezultatet që meriton. Pasi i ripashë ndeshjet, jam i bindur se kemi marrë më pak nga sa meritonim.
Mesazhi i Sormanit: Në këto momente solidariteti, gjithsecili duhet të bëjë detyrën e tij si qytetar, të qëndrojë në shtëpi dhe të mos vihet në kushtet që mund të shndërrohet në një bartës të virusit. Në këto momente kjo është gjëja më e rëndësishme.
