Në një telekonferencë me 55 Federatat Europiane, UEFA, është shprehur optimiste në mundësinë e përfundimit të kampionateve kryesore si dhe Ligën e Kampioneve.
Gjithçka shpresohet se do të startojë në muajin qershor, pavarësisht paqartësive të mëdha në të gjithë kontinentin e vjetër prej krizës së coronavirusit.
Në mbledhjen e mbajtur, është rënë dakord për të pezulluar të gjitha ndeshjet e skuadrave kombëtare, për të liruar vend në kalendar. Një ndër ndeshjet që shtyhet me këtë vendim është ajo mes Maqedonisë së Veriut dhe Kosovës, i vlefshëm për “Play-Off” të Ligës së Kombeve.
Ideja është që lojtarët të kthehen në klubet e tyre gjatë muajit maj duke zhvilluar një mini-fazë përgatitore, duke marrë parasysh sigurisht, zhvillimin e pandemisë.
Si La Liga ashtu dhe Premier League, deklaruan gjatë mbledhjes që prioriteti i tyre është të përfundojnë kampionatet vendase dhe sezonin e Ligës së Kampioneve, kjo edhe nëse do të luhej përtej verës.
Një nga problemet e parashtruara duke përfunduar këtë sezon në gusht, apo më vonë, është se e kontratat e disa lojtarëve dhe trajnerëve do të duhet të zgjatet përtej 30 Qershorit, e cila lidhet edhe me konfliktin mbi mënyrën se si do të funksiononin transferimet gjatë muajve të verës.
Ndërsa FIFA është e gatshme të adaptojë rregullat për të marrë përgjegjësinë mbi këtë, FIFPro, paralajmëron se nëse do të ishte kështu, atëherë ky duhet të jetë një rregull universal dhe të zbatohet për të gjithë futbollistët, jo vetëm për ata lojtarë që klubet kanë interes të mbajnë.
Duke vëzhguar dhe situatën e coronavirusit, UEFA do të mbajë takime të tjera, pasi mbeten akoma shumë pikëpyetje të cilat kërkojnë përgjigje.
