Si shumë futbollistë të tjerë, edhe Marcus Rashford është sensibilizuar me situatën që ka krijuar coronavirusi dhe bën thirrje për bashkim për të ndihmuar personat të cilët janë në nevojë.
22-vjeçari me një grumbullim fondesh ka ndihmuar shumë fëmijë në vështirësi ekonomike të mbetur pa vaktet falas të parashikuar nga sistemi shkollor anglez që të hanë rregullisht. Anglezi, gjithashtu i bën thirrje skuadrave të Manchesterit, City-t dhe United që të bashkohen në të mirë të komunitetit.
“Po kërkoj vetëm që të kem një ndikim pozitiv kundrejt brezave të ardhshëm”, ka thënë ylli i Manchester United për BBC.
“Kam punuar me fëmijët dhe kur kam mësuar për mbylljen e shkollave, e dija se disa fëmijë nuk do t’i kishin më vaktet falas”.
“E kam shfrytëzuar këtë mundësi kur isha në shkollë. Kam qenë me fat sepse ka shumë fëmijë me më shumë vështirësi. Mendoj se në momentet e vështira, dy klube si ato të Manchester-it duhet të kenë një përgjegjësi të madhe sociale”.
“Duhet të bashkohen për të bërë diferencën, veçanërisht kur ndodhin gjëra që shkojnë përtej futbollit”, ka thënë Rashford.
