Sopranoja me famë botërore Ermonela Jaho do të interpretojë rolin e Desdemonës në operën “Otello”, të Giuseppe Verdit, që do të vihet në skenë në Teatrin Real në Madrid të Spanjës në 15 shtator.
Opera do të çelë sezonin e ri artistik të këtij teatri, ku roli kryesor do të vijë nën interpretimin e shqiptares Ermonela Jaho dhe Gregory Kunde si Otello.
Sopranoja shqiptare sjell me këtë shfaqje edhe Verdin, një vepër të të cilit Teatri Real, nuk e ka sjellë që nga nëntori i vitit 1999.
Mediat spanjolle e quajnë sopranon një artiste në rritje, e cila po shkëlqen në skena botërore, e fuqishme për role si ky i Desdemonës, pas debutimit të saj këtë verë krah Placido Domingos. Sopranoja do të ngjitet në skenën e Teatrit Real në datat 18,21,27,27 dhe 30 shtator, si dhe në natën e fundit në 3 tetor.
