Neymar aktualisht ndodhet në Brazil pasi kampionati francez është i pezulluar të paktën deri më 2 prill.
I ndodhur në vendlindje ylli brazilian i futbollit ka shpërfillur udhëzimet për distancimin shoqëror për shkak të Koronavirusit dhe këtë e ka treguar me disa fotografi që ka postuar në rrjetet sociale, ku shfaqet duke shijuar rrezet e diellit në shoqërinë e disa miqve të tij në një fushë volejbolli me rërë.
Ky veprim i Neymarit bie në kundërshtim të drejtpërdrejtë me këshillat e dhëna nga Organizata Botërore e Shëndetit (OBSH) në përpjekje për të luftuar përhapjen e virusit.
Neymar i ka injoruar masat e sigurisë, duke vazhduar shoqërimin me miqtë e tij, edhe pse kryetarët e bashkive dhe guvernatorët në të gjithë Brazilin i kanë porositur njerëzit të qëndrojnë brenda dhe të izolohen.
