Ministria e Shëndetësisë publikoi sot rastet e reja të zbuluara me Covid 19 në Shqipëri. Nga 102 teste të kryera janë evidentuar 12 pacientë, ndërsa numri në total ka arritur në 186.
Shifra e sotme, pavarësisht shtimit të pacientëve të prekur, është më e ulët se ajo e publikuar mesditën e djeshme nga Ministria e Shëndetësisë, me pothuajse 50 % më pak raste të evidentuara.
Referuar të dhënave zyrtare, në pavionin e Infektivit i kthyer prej disa javësh në njv spital “Covid 1” ndodhen të shtruar 77 pacientë, nga të cilët 5 ndodhen në terapi intensive.
Gjatë orëve të fundit kanë humbur jetën dy pacientë, një grua 85 vjeçe dhe një burrë 66 vjeç, që vuanin edhe nga sëmundje të tjera. Në total numri i personave që kanë humbur jetën ka arritur në 8, ndërsa dy pacientët më të rinj janë një 43 vjeçar nga Kavaja, i cili nuk vuante nga sëmundje të tjera dhe një 48 vjeçar me origjinë nga Puka, por banues në Tiranë.
Sipas Ministrisë së Shëndetësisë, deri mesditën e sotme, një mjek dhe një infermier janë shëruar dhe në total, numri i personave të shëruar ka arritur në 31.
