Profesor Tritan Kalo, një prej mjekëve të njohur të Infektivit, që po përballet me pacientët e prekur nga koronavirusi, u ka dhënë një recetë optimiste qytetarëve shqiptarë, të trembur dhe të lodhur nga karantina prej pandemisë botërore të Covid 19.
“Një recetë mbarëkombëtare. 24 mars 2020 ora 21:00. Në këtë kohë “covidiane” na duhet edhe pak optimizëm gastronomik.
Jeni të mirëpritur miq e shokë, kuptohet nëse jua lejon qeveriu, daljen në këtë orë, që të konsumojmë sa është ende e ngrohtë këtë pjatë me përbërës mbarëshqiptarë: trahana Lunxhërie, bukë shtëpie me miell katunarije, suxhuk pikant prizreni, vaj ulliri berati e patosi përzier, pluhur speci të kuq nga gramshi, djath dele konispoli, ujë selite, kripë narte si dhe duart e shkathëta të një djali me përzierje genike Elbasani dhe Gjirokastre.
Mos t’ju lëshojë zemra bashkëkombasit e mi.Ne bashkë do t’ia dalim mbanë!!!!”, shkruan Kalo në rrjet, duke postuar foton e mëposhtme.
Mesazhi optimisht i mjekut të njohur vjen në një kohë kur rastet me koronavirus, të identifikuara zyrtarisht nga ISHP, kanë arritur në 123, ndërkohë që 5 persona kanë humbur jetën nga Covid 19.
