Koronavirusi po vret në Iran një person cdo 10 minuta; informacionin e ka përcjellë përmes Twitter-it një zëdhënës i ministrisë së shëndetësisë, teksa bilanci i vdekjeve në vendin më të prekur nga koronavirusi në Lindjen e Mesme mbërriti në 1,284.
Në mesazhin e tij, Kianush Jahanpur shtonte se rreth 50 persona infektohen çdo orë në republikën islamike. Kritikët kanë shprehur prej kohësh dyshime se zyrtarët iranianë nuk po e deklarojnë numrin e saktë të personave të infektuar me sëmundjen Covid-19, që shkaktohet nga koronavirusi.
Si pasojë e përhapjes së koronavirusit, Irani ka ndërmarrë një sërë masash, përfshirë mbylljen e shkollave e universiteteve dhe pezullimin e ngjarjeve fetare, kulturore dhe sportive. Së fundi, atje u shtua dhe numri i të burgosurve të liruar përkohësisht i cili ka arritur në 85,000; në mesin e tyre ka edhe të burgosur politikë.
