Zbardhen emrat e viktimave nga aksidenti i djeshëm, që ndodhi në autostradën Fushë Krujë-Laç. Sipas News 24, shtetasit që humbën jetën janë Fatlum Xhikoli, 33 vjeç, Arben Kani, 36 vjeç, Nazim Rrahmani, 36 vjeç, dhe Luljan Mahilaj 45 vjeç.
Sipas burimeve policore për qarkullimin e automjetit nuk ka pasur autorizim për të qarkulluar, referuar rregullave të reja, si pasojë e situatës emergjente, për shkak të koronavirusit.
Aksidenti ka ndodhur mbrëmjen e djeshme në kryqëzimin e fshatit Borizanë, në Fushë-Krujë.
Policia sqaron se nga përplasja e një makine tip “Audi” me një kamion me targa kosovare humbën jetën 4 persona, tre në vendin e ngjarjes, dhe i katërti në Spitalin e Traumës, ku nuk mund t´i mbijetonte plagëve.
“Më datë 18.03.2020, rreth orës 20:30, në autostradën Fushë Krujë-Laç, një mjet tip “Audi”, i ka rënë nga mbrapa një kamioni me targa kosove”, bëri të ditur policia.
