Nga BoldNews.al
Edi Rama po aplikon filozofinë e kërbaçit mbi qytetarët e traumatizuar nga përhapje e korona-virusit, një qasje që kabineti i tij e ka prezantuar që në fillim të marrjes së mandatit të parë në vitin 2013, në kuadër të platformës së tij “Të bëjmë shtet”.
I paaftë për të siguruar rritjen e mirëqënies ekonomike, si edhe në hartimin e strategjive për mbrojtjen sociale, Edi Rama zgjodhi të aplikonte politikën e forcës policore mbi qytetarët.
Një qasje të tillë po aplikon, me sukses, edhe gjatë ditëve të fundit, kur shqiptarët, të tensionuar nga situata me përhapjen e epidemisë së virusit, dëgjojnë nga Qeveria vetëm marrjen e masave për gjobitjen e tyre.
Virusi parandalohet me gjoba?
Në Aktin Normativ me fuqinë e ligjit, të miratuar në 15 Mars 2020, qeveria prezanton të paktën 16 gjoba, me vlerë nga 500 mijë deri në 10 milionë lekë (të reja).
Edi Rama mundohet t’i justifikojë këto masa, gjatë daljeve të tij në rrjete sociale nga shtëpia, si të vetmet mënyra për të kufizuar kontaktet mes njerëzve, me qëllim parandalimin e përhapjes së virusit.
Në raste epidemie, përfshirë edhe pandemitë, qeveritë hartojnë plane për të forcuar sistemin shëndetësor, për rritjen e kapaciteteve testuese, si edhe për sigurimin e vijimësisë normale, për aq sa është e mundur, të qytetarëve.
Në rastin e Edi Ramës, fokusi kryesor i masave të marra prej tij është forcimi i autoritetit policor mbi qytetarët, ndërkohë që, siç ka raportuar më parë “Boldnews.al”, numri i testeve për korona-virus është në shifra minimale, si edhe plani për shpëtimin ekonomik të biznesit po vonon prej shumë ditësh.
Të dhënat e deritanishme zyrtare tregojnë se, të paktën 16% e të prekurve nga korona-virusi në Shqipëri janë staf mjekësor, duke dëshmuar për dështimin e masave parandaluese në radhët e sistemit të Shëndetësisë.
Numri i testeve ditore arrin në rendin e 40-60 të tilla në ditë, ndërkohë që forca e përhapjes së korona-virusit është shumë e madhe dhe e gjerë.
Por, ajo që Qeveria “Rama” po aplikon me sukses këto ditë “karantinimi”, është forcimin e masave policore.
Zyra e propagandës qeveritare përhap çdo ditë informacione mbi gjobat për automjetet, sekuestrot apo ndjekjet alla-hollivudiane të mjeteve në rrugë.
Një hapësirë të rëndësishme në kronikat policore marrin masat administrative që policët po aplikojnë ndaj qytetarëve këmbësorë, të cilët, për shkak të nevojave të tyre, thyejnë orarin limit të lëvizjes-18.00 të mbrëmjes. (Nga e Mërkura, orari i lëvizjes në këmbë kufizohet në 6 orë-në fashat orare 06.00-10.00 dhe 16.00-18.00).
Duket qartë se Edi Rama, në tentativë për të mbuluar dështimin e tij spektakolar me sistemin e Shëndetësisë, mundohet të minimizojë irritimin qytetar nëpërmjet masave represive gjobë.
