Nga Boldnews.al
“O ju vëllezë e motra që bëni ca pyetje sikur po vuani nga dora e robit, jo nga dora e Zotit. A do ta kuptoni edhe ju, siç e ka kuptuar shumica, se kjo është luftë e vërtetë dhe pyetja është: Po t’i shihnit avionët që ju bombardojnë mbi kokë dhe plagët që hapin, a do t’i bënit ato lloj pyetjesh”?-shkruan Rama, i mërzitur fort nga komentet dhe pyetjet e qytetarëve.
Më shumë se ankesë për mbyllje në shtëpi për shkak të përhapjes së virusit “COVID-19”, qytetarët po ankohen për varfërinë, mungesën e shërbimeve shtetërore, injorancën qevrisëse, por edhe papërgjeshmërinë e pushtetit lokal që edhe në kohën e “kolerës” së re “COVID-19”, përhapin propagandë idiote, që në ditën e pestë në karantinë, askush nuk po e konsumon më, as ata Rilindasit e thekur.
Virusi mund të jetë “Dora e Zotit” sipas kryeministrit tonë, po dora e robit në qeveri çfarë po bën? Varfëria është dorë e Zotit apo e robit? Shifrat e varfërisë po rriten ndjeshëm, ndërsa vendi është në një kolaps ekonomik, duke shfaqur pompozitet nga jasht, por i gërryer brenda nga “sëmundja” gati 30-vjeçare e politikave qeveritare. Edhe pse jemi një vend i vogël me një popullsi prej rreth 2.5 milionë banorë rezidentë, numërohen mbi 300 mijë familje në nëvojë. E kjo nuk është aspak “Dora e Zotit”, por e robit, atij robit të “madh” në krye të qeverisë.
Mos është “Dora e Zotit” që në të gjithë vendin janë nëpër spitale vetëm 130 pajisje “intubuese” ose siç njihen ndryshe oksigjenim me drejtim të komanduar? Në rast të përkeqësimit të situatës epidemike, rrezikojmë që të futemi në kaos, pasi mund të jetë nevoja për shumë aparatura të tilla dhe pacientët do të rrezikojnë seriozisht jetën pikërisht për shkak të mungesës së këtyre pajisjeve.
Kjo nuk është “Dora e Zotit”, por e katastrofës në shëndetësi që lëvron mbi 300 milionë euro për koncesionin e analizave dhe të pajisjeve kirurgjikale, për të cilat po hetohen nga SPAK (qoftë edhe me hapin e breshkës), por nuk blejnë pajisje kaq të domosdoshme, jo vetëm në këtë rast, por në çdo situatë. Koncesionet abuzive ishin “dora e robit”…!
Nëse Bashkia Tiranë “spërkat propagandë” duke nxjerrë për gjoja “dezinfektim” dy autobote të lodhura, kjo nuk është “Dora e Zotit”, por e robit që ka mbetur robot i një i sëmundjes së pashërueshme të imazhit dhe mirazhit.
Nëse biznesi i vogël sot është në kulmin e depresionit dhe gati në paralizë totale, (po zgjati sityuata edhe për pak javë), nuk është “dora e Zotit”, por e robit në qeverisje që nuk i mbështet, përkundrazi i rëndon me tarifat e shtrenjta të shërbimit, apo me politikat fiskale të paqëndrueshme të cilat ndryshojnë disa herë brenda pak vitesh. Varfëria, abuzimi, korrupsioni, papërgjeshmëria dhe keqqeverisja janë “dora e robit”, o robo….!
