Ekziston një mit se koronavirusi i godet më lehtë të rinjtë. Por gazeta italiane, Corriere della Sera shkruan se mes të shtruarve në terapinë intensive, mbi 12 përqind janë nën 50 vjeç. Ndërsa numri i të vdekurve nën 50 vjeç është 6.
Luca Lorini nga spitali i Bergamos thotë se po shtohet numri i të rinjve që shfaqin probleme të rënda nga koronavirusi.
“Tipi i pacientëve po ndryshon. Tani po shohim pacientë më të rinj, që janë 40 deri në 45 vjeç. Po vijnë për shkak se kanë qenë të sëmurë për disa ditë dhe janë kuruar në shtëpi, por më pas janë përkeqësuar”, thotë ai.
Sipas tij, nga 80 krevate në reanimacion, 30 janë të zënë nga persona nën 60 vjeç. Tre ditë më parë një 42-vjeçar u vendos në tuba për shkak të sëmundjes. Po ashtu u shtruan edhe dy gra 49 dhe 55 vjeç. Të gjithë dukeshin në shëndet të mirë përpara se të prekeshin nga koronavirusi.
Në ditët në vazhdim pritet që numri i personave më të rinj, të sëmurë nga koronavirusi, do të shtohet. Autoritetet thonë se kjo do vijë për shkak të periudhës së inkubacionit.
Për më tepër, kjo moshë e të rinjve të rritur ka më shumë kontakte sociale dhe e qarkullon më shumë sëmundjen.
