Kush thyen vetëkarantinimin do të gjobitet me 5 mijë euro gjobë. Kjo u bë e ditur nga Kryeministri Edi Rama, i cili njoftoi se nga dita e sotme forca të Policisë së Shtetit dhe asaj Ushtarake do të organizojnë kontrolle ndaj personave që dy javët e fundit kanë hyrë në Shqipëri nga Italia dhe Greqia.
Rama tha se këta persona duhet të qëndrojnë në karantinë, ndërsa tha se kush do të thyejë karantinën do të gjobitet me 5 mijë euro.
“Zbatoni këshillat e ekspertëve, nuk është frikë as panik, por janë masa për të përballuar këtë situatë”, tha Rama.
Ai drejtoi një apel për të qëndruar në shtëpi të gjithë ato që nuk e kanë të domosdoshme të dalin, ndërsa shprehu besimin se kjo situatë mund të kalohet vetëm me kujdes dhe duke respektuar rregullat.
