Klubi i Milanit ka konfirmuar shkarkimin e Zvonimir Boban, në rolin Drejtorit të Futbollit te klubi kuqezi.
Shkarkimi ka ardhur pasi marrëdhëniet mes shefit ekzekutiv të skuadrës, Ivan Gazidis dhe Boban u përkeqësuan. Nga mediat italiane, u bë e ditur se Gazidis duke qenë i pakënaqur me punën e Boban-it, kishte kontaktuar me trajnerin e Leipzigut, Ralf Rangnick, për mundësinë e tij për të marrë rolin e Drejtorit të Futbollit te skuadra e Milanit.
Kjo gjë nuk i ka pëlqyer aspak Boban-it, i cili nuk kishte aspak dijeni për këtë çështje. Pakënaqësinë e tij, Boban e shprehu në një intervistë me “Gazzeta dello Sport” në muajin shkurt, intervistë në të cilën e quante sjelljen e Gazidis si “jo elegante” dhe fyese.
Në njoftimin e klubit kuqezi thuhet:
“AC Milan konfirmon se i ka komunikuar zotit Zvonimir Boban ndërprerjen e kontratës me efekt të menjëhershëm për rolin e Shefit të Futbollit në klub. Klubi falënderon Zvonimir për punën e tij në këto 9 muaj dhe i uron më të mirën për të ardhmen profesionale. Klubi konfirmon besimin e plotë te Stefano Pioli dhe stafi teknik si dhe sheh me optimizëm drejt pjesës së mbetur të sezonit, me vendosmërinë për të vazhduar rrugëtimin e rritjes për t’u kthyer në majat e futbollit botëror me një projekt në përputhje me parametrat e Fair Play Financiar”.
