Ish-portieri argjentinas, Hugo Gatti, ka bërë një deklaratë të guximshme, teksa thotë që Lionel Messi nuk është më ai lojtari magjik që ka qenë dikur.
Gatti, tashmë 75 vjeçar, njihet për kritikat e tij për Messin për të cilin më parë ka deklaruar se i mungojnë instinktet e liderit dhe për pasojë Maradona është futbollisti më i mirë argjentinas i të gjitha kohërave.
Duke u prononcuar për emisionin e famshëm spanjoll, “El Chiringuito”, Gatti ka thënë:
“Nuk më intereson nëse më kritikojnë në Argjentinë. Unë jam patriot i vendit tim dhe duke marrë karrierën e tij, Messi është një fenomen, por tani ai nuk është aspak i tillë, në fakt ka disa kohë që ai nuk është”.
“Messin e trajtojnë në mënyrën e gabuar, e mbrojnë shumë, thuajse i falen atij, kjo është diçka e gabuar. Ai mësohet me këtë situatë dhe kohët e fundit vetëm ecën në fushë, të gjithë ata që e kuptojnë futbollin mendojnë të njëjtën gjë”.
