Lulzim Basha, Kryetar i PD-së, ka propozuar një reformë radikale të sistemit zgjedhor.Gjatë një takimi me të rinj dhe intelektualë, Basha tha se sistemi zgjedhor nuk mund të përcaktohet nga partitë, por nga populli.
Pra referuar këtij propozimi, PD do të kërkojë referendum lidhur me përcaktimin e sistemit zgjedhor.
Basha tha se kërkohet një sistem që i kërkon llogari qeverisë, duke shtuar se sistemi zgjedhor duhet të garantojë kontrollin dhe balancimin e pushteteve, në mënyrë që pushteti të mos përqendrohet në një dorë.
“Zgjedhjet në Shqipëri janë prishur. Vota jonë nuk ka vlerë për shkak të paracaktimit të rezultatit. Është koha të ndryshojmë rregullat.
Ndryshimi i parë, kontroll të plotë kushtetues dhe ligjor mbi kandidatët, që të jenë të pastër dhe me integritet. Kontrolli të bëhet nga një organizëm i pavarur.
Ndryshimi i dytë, tolerancë zero për ata që përfshihen në shitblerjen e votës. Edi Rama i ka mbrojtur dhe promovuar, ne do t’i çojmë në burg.
Ndryshimi i tretë, financimi i partive, që ato të mos varen nga biznese dhe individë të pasur. Politikanët të varen nga njerëzit dhe të kontrollohen prej tyre”, u shpreh Basha.
Në vijim, ai paraqiti kushtin e shprehur nga PD edhe në tryezën për reformën zgjedhore, sipas të cilit kush financon partitë, përjashtohet nga marrja e tenderave publikë pas zgjedhjeve, që të mos përfitojnë për shkak të donacioneve për partitë.
Një tjetër ndryshim, sipas Bashës, është identifikimi, votimi dhe numërim elektronik, që garanton zgjedhje më të ndershme dhe nxjerrje të rezultatit më të shpejtë.
Kreu demokrat iu rikthye propozimeve të bëra në “Çadrën e Lirisë” në 2017, para marrëveshjes së 17 majit me Edi Ramën, kur tha foli për Parlamentin dy dhomësh, njëra prej të cilave të quhej Senat.
“40 anëtarët e Senatit zgjidhen bashkë më 100 anëtarët e Parlamentit. Parlamenti me dy dhoma nuk rrit koston për qytetarët, por ndryshon mundësinë për t’u shërbyer njerëzve në mënyrë pozitive”, tha Basha.
Sipas tij, arroganca dhe presioni i qeverisë nuk do të funksionojnë më për një Parlament të fuqizuar me dy dhoma, pasi Qeveria duhet të kërkojë konsensus me të dy dhomat.
Në vijim, ai shtoi se derisa Shqipëria të bëhet anëtare e BE, 100 ditë para zgjedhjeve shqiptarët të kenë një qeveri kujdestare për të menaxhuar procesin, për të garantuar zbatimin e ligjeve dhe votën e lirë.
“Shitblerja e votës shuan zërin e qytetarëve dhe i jep kontrollin një grushti politikanësh, biznesmenësh dhe kriminelësh të fuqishëm.
Reforma zgjedhore është hapi i parë për t’i dhënë fund korrupsionit, për një ekonomi më të fortë dhe anëtarësim në BE.
Mënyra e zhvillimit dhe rezultati i zgjedhjeve ndikon direkt në jetën tonë. Me një rezultat të ndershëm përfitojnë të gjithë shqiptarët”, tha Basha.
