Motra e Taulant Ballës, Alba ka dalë në mbrojtje të të vëllait duke postuar një foto ironizuese në rrjetet e saj sociale kundër zëdhënësit të Presidentit Ilir Meta, Tedi Blushi.
Ajo ka postuar një foto të një personi që gjendet pas të ndenjurave të një tjetri, duke simbolizuar Metën dhe Blushin.
Ndërsa sipër fotos ajo shkruan: Zëdhënësi Bilbilushi, në krye të detyrës.
Kreu i grupit parlamentar të PS-së, Taulant Balla në një konferencë për shtyp duke folur për një shpërndarje të mundshme të parlamentit nga kreu i shtetit, ashtu siç ai e paralajmëroi më 2 mars, tha se “Meta i vjen anash Kuvendit”. Ndërsa Presidenca iu përgjigj me anë të zëdhënësit të saj Tedi Blushi, i cili i shkruante Ballës në FB që të dëgjonte zërin e popullit, duke iu referuar “po-së” në shesh që mori Meta kur pyeti turmën nëse duhet ta shpërndante Parlamentin me dekret.
Pas kësaj reagoi këshilltari i Taulant Ballës për mediat, i cili publikoi foton e kreut të shtetit në resortin “Golden” në pronësi të fisit Hajri, i cili tashmë është sekuestruar nga SPAK pasi në të, më 17 janar u mbajt peng dhe u vra 49-vjeçari Jak Prenga. Por një përgjigje erdhi sërish nga Blushi që i kërkoi Ballës që foton ta dërgonte për hetim në SPAK.
“Sa për foton, bie erë iceneratorësh kjo flluskë e mjerë! Por mos humb më asnjë sekondë! Çoje direkt drejt SPAK-ut! Bashkë me të edhe bisedën e freskët tek zyra e ministrit për të ekstraduar të vëllanë nga Italia në Shqipëri! Bashkë me to trego edhe shokët e motrës! Bëj durim Tao se nuk do gjesh as ti vrimë ku të futesh! DËGJOJE prapë SOVRANIN dhe bëj durim! Me qetësi dhe drejtësi!”, shkroi Blushi.
