Ministrja e Shëndetësisë Ogerta Manastirliu deklaroi mëngjesin e sotëm se Shqipëria nuk ka asnjë rast me koronavirus.
“Janë analizuar 42 raste të dyshuara së fundmi, të cilat kanë dalë negative, pa virus. Po ashtu, edhe Kosova, Mali i Zi, Turqia dhe Hungaria, nuk kanë asnjë të konfirmuar me koronavirus”, tha Manastirliu, duke shtuar se në Maqedoninë e Veriut ka vetëm 1 rast të izoluar.
Por duket se mospërhapja e koronavirusit në Shqipëri, ndërkohë që Italia, vend fqinj, ka konfirmuar të tjera raste, ka habitur edhe ekspertin e OBSH-së, Raul Gonzales, i cili drejton zyrën e kësaj organizate në Tiranë.
I pranishëm në mbledhjen e Task Forcës së Ministrisë së Shëndetësisë për koronavirusin, Gonzales u shpreh se në lidhje me këtë virus e gjithë Bota është duke studiuar dhe se nuk kishte një përgjigje të prerë për pyetjen e ngritur për vendin tonë.
Gonzales shtoi se shqiptarët duhet të besojnë të institucionet më shumë se sa te informacionet e rreme që qarkullojnë.
“Dua të vë pak theksin tek pyetja më e zakontë dhe e shpeshtë pse nuk ka asnjë rast në Shqipëri. Ajo që do ju kërkoja unë si përfaqësues i OBSH është të keni besim tek institucionet, kapacitetet e ekspertëve që një pjesë e tyre janë të certifikuar edhe ndërkombëtarisht.
Sapo jam kthyer nga Spanja, vendi im dhe para dy javësh kemi hasur raste të përsonave të infektuar. Por pse nuk ka në Shqipëri? Ne jemi ende duke mësuar, kjo është dicka e re për ne. Personat që u zbuluan në vendin tim nuk kishin qenë as në Itali as nuk kishin pasur kontakt me vendet ku incidenca është më e shpeshtë.
Ne ditë pas dite po mësojmë më shumë mbi këtë virus, po mbledhim informacione nga të gjitha rastet në të gjitha vendet e prekura. Ne duhet t’i shmangemi keqinformimit apo fake news, duhet të kemi besim te institucionet tona të mos shpërndajmë lajme të rreme që i bëjnë keq shëndetit dhe ekonomisë së vendit. Ne po punojmë ngushtësisht me qeverinë shqiptare në këtë drejtim”, tha ai.
