Rreth 1 mijë forca policore do të angazhohen përgjatë bulevardit “Dëshmorët e Kombit”, atje ku do të mbahet në orën 17:00 manifestimi i thirrur nga Presidenti i Republikës për mbrojtjen e Kushtetutës.
Policia bëri të ditur se forcat e policisë dhe ato të gardës do të marrin në ruajtje institucionet përgjatë bulevardit, kryesisht godinën e Kryeministrisë dhe Parlamentit, por edhe Ministrinë e Brendshme.
Një kordon me policë do të rrethojë godinën e Kryeministrisë, ndërsa forca të ndërhyrjes së shpejtë do të jenë të përqëndruara pas saj, dhe do të ndërhyjnë vetëm në rast të precipitimit të situatës. Për mbarëvajtjen e manifestimit do të angazhohen edhe repartet speciale të FNSH dhe ato “Shqiponja”.
Presidenca nga ana e saj njoftoi pak ditë më parë se 3 mijë vullnetarë do të angazhohen për mbarëvajtjen e manifestimit, ndërsa Presidenti Ilir Meta i ka drejtuar një apel qytetarëve që të mbajnë në duar flamuj kombëtarë dhe mimoza.
Përgjatë bulevardit do të ketë një kufizim të trafikut, duke mos lejuar kalimin e automjeteve apo parkimin e tyre.
Presidenti pritet të firmosë dekretin e parë kundër atij që e quan “grusht shteti”. Dekreti me shumë gjasa do të jetë kundër ndryshimeve në procedurat e betimit të anëtarëve të Gjykatës Kushtetuese, për të cilat Kuvendi me shumicë votash vendosi që nëse Presidenti nuk njofton ceremoninë brenda 10 ditësh, atëherë anëtari i përzgjedhur sipas ligjit, kryen betimin dhe njofton me shkrim institucionet.
